Recipe world

Here are some recipes which I came across through the net, books, so on and few are my own experiments..

Friday, 4 May 2018

ಬೆಂಡೆಕಾಯಿ ಪಲ್ಯ

ನಮ್ಮ ಮನೆಯಲ್ಲಿ ತಯಾರಿಸುವ ಸಿಂಪಲ್ ಅಡುಗೆಗಳಲ್ಲಿ ಈ ಪಲ್ಯವೂ ಒಂದು. ಅಡುಗೆಮನೆಯಲ್ಲಿ ಸಾಮಾನ್ಯವಾಗಿ ಇರುವ ಕೆಲವೇ ಸಾಮಗ್ರಿಗಳನ್ನು ಬಳಸಿ ಜಟ್ ಪಟ್ ಎಂದು ಮಾಡಿಬಿಡಬಹುದಾದ ಸೈಡ್ ಡಿಶ್ ಇದು. 
ತುಂಬಾ ಜನರಿಗೆ ಬೆಂಡೆಕಾಯಿ ಇದರ ಲೋಳೆ ಗುಣದಿಂದಾಗಿ ಇಷ್ಟವಾಗುವುದಿಲ್ಲ. ಆದರೆ ಲೋಳೆ ಆಗದಂತೆ ಕ್ರಮಬದ್ಧವಾಗಿ ಅಡುಗೆ ಮಾಡಿದರೆ ಅದರ ರುಚಿಯೇ ಬೇರೆ. ನಮ್ಮ ಆರೋಗ್ಯದ ದೃಷ್ಟಿಯಿಂದಲೂ ಬೆಂಡೆಕಾಯಿಯ ಸೇವನೆ ಬಹಳ ಒಳ್ಳೆಯದು. 
ಸಿಂಪಲ್ ಆಗಿ ತಯಾರಿಸಬಹುದಾದ ಬೆಂಡೆಕಾಯಿ ಪಲ್ಯದ ರೆಸಿಪಿ ಇಲ್ಲಿದೆ:


ತಯಾರಿಸಲು ಬೇಕಾಗುವ ಸಮಯ: 20 ನಿಮಿಷಗಳು
ಸರ್ವಿಂಗ್ಸ್: 2 ಜನರಿಗೆ ಆಗುತ್ತದೆ
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್

ಬೇಕಾಗುವ ಸಾಮಗ್ರಿಗಳು:

  • ಬೆಂಡೆಕಾಯಿ - 15
  • ಆಮ್ ಚೂರ್ ಪೌಡರ್ (ಹುಳಿಪುಡಿ) - 3/4 ಟೀ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು
  • ಉಪ್ಪು - ರುಚಿಗೆ ತಕ್ಕಷ್ಟು
  • ತೆಂಗಿನತುರಿ - 2ರಿಂದ 3 ಟೇಬಲ್ ಸ್ಪೂನ್
  • ಒಗ್ಗರಣೆಗೆ: 
        ಎಣ್ಣೆ - 2 ಟೇಬಲ್ ಸ್ಪೂನ್,
        ಒಣಮೆಣಸು - ಒಂದು ಚೂರು,
        ಉದ್ದಿನಬೇಳೆ - 1 ಟೀ ಸ್ಪೂನ್,
        ಸಾಸಿವೆ - 1 ಟೀ ಸ್ಪೂನ್,
        ಇಂಗು - ಚಿಟಿಕೆ,
        ಅರಿಶಿನ - 1/4 ಟೀ ಸ್ಪೂನ್,
        ಕರಿಬೇವು - 7ರಿಂದ 8 ಎಲೆಗಳು,
        ಹಸಿಮೆಣಸು - 1 (ಖಾರಕ್ಕೆ ತಕ್ಕಂತೆ)

ತಯಾರಿಸುವ ವಿಧಾನ:

  • ಬೆಂಡೆಕಾಯಿಯನ್ನು ತೊಳೆದು ಬಟ್ಟೆ ಅಥವಾ ಪೇಪರ್ ಟವೆಲ್ ನಿಂದ ಚೆನ್ನಾಗಿ ಒರೆಸಿಕೊಳ್ಳಿ. ನಂತರ ಇವನ್ನು ಆದಷ್ಟು ತೆಳ್ಳಗೆ ಹೆಚ್ಚಿಕೊಳ್ಳಿ. 
  • ಒಂದು ದಪ್ಪ ತಳದ ಬಾಣಲೆ ಬಿಸಿಗಿಟ್ಟು ಎಣ್ಣೆ, ಒಣಮೆಣಸು, ಉದ್ದಿನಬೇಳೆ, ಸಾಸಿವೆ ಸೇರಿಸಿ. ಸಾಸಿವೆ ಚಟಪಟ ಎನ್ನುತ್ತಿದ್ದಂತೆ ಇಂಗು, ಅರಿಶಿನ, ಸೀಳಿದ ಹಸಿಮೆಣಸು, ಕರಿಬೇವು ಹಾಕಿ ಕೈಯಾಡಿಸಿ ಒಂದು ನಿಮಿಷ ಹುರಿಯಿರಿ.  
  • ನಂತರ ಇದಕ್ಕೆ ಹೆಚ್ಚಿದ ಬೆಂಡೆಕಾಯಿ ಸೇರಿಸಿ ಕೈಯಾಡಿಸಿ. 
  • ಪಲ್ಯದ ಮಿಶ್ರಣಕ್ಕೆ ರುಚಿಗೆ ತಕ್ಕಷ್ಟು ಉಪ್ಪು, ಆಮ್ ಚೂರ್ ಪೌಡರ್ ಸೇರಿಸಿ ಮಿಕ್ಸ್ ಮಾಡಿ, ಮುಚ್ಚಳ ಮುಚ್ಚದೆ ಬೇಯಿಸಿ. ತಳ ಹಿಡಿಯದಂತೆ ಆಗಾಗ ಕೈಯಾಡಿಸುತ್ತಿರಿ. ಬೆಂಡೆಕಾಯಿ ತೆಳ್ಳಗೆ ಹೆಚ್ಚಿರುವುದರಿಂದ ಬೇಯಲು ಹೆಚ್ಚು ಸಮಯ ಬೇಕಾಗುವುದಿಲ್ಲ.  
  • ಪಲ್ಯದ ಮಿಶ್ರಣ ಮುಕ್ಕಾಲುಭಾಗ ಬೆಂದಾಗ ಇದಕ್ಕೆ ತೆಂಗಿನತುರಿ ಸೇರಿಸಿ. ಮಿಶ್ರಣ ಪೂರ್ತಿ ಬೆಂದನಂತರ ಉರಿ ಆಫ್ ಮಾಡಿ. 
  • ಈ ಪಲ್ಯ ಅನ್ನ, ಚಪಾತಿಯೊಡನೆ ಹಾಕಿಕೊಳ್ಳಲು ಚೆನ್ನಾಗಿರುತ್ತದೆ. 


ಟಿಪ್ಸ್:

  • ಈ ಪಲ್ಯಕ್ಕೆ ಬೆಂಡೆಕಾಯಿಯನ್ನು ತೆಳ್ಳಗೆ ಹೆಚ್ಚಿದಷ್ಟೂ ಚೆನ್ನ. 
  • ಈ ಪಲ್ಯ ಬೇಯಿಸುವಾಗ ನೀರು ಸೇರಿಸಬೇಡಿ. 
  • ಈರುಳ್ಳಿ ಇಷ್ಟಪಡುವವರು ಪಲ್ಯ ಮುಕ್ಕಾಲುಭಾಗ ಬೆಂದಾಗ ಹೆಚ್ಚಿದ ಈರುಳ್ಳಿ ಸೇರಿಸಿಕೊಳ್ಳಬಹುದು. 
  • ಪಲ್ಯವನ್ನು ತುಂಬಾ ಸಲ ಕೈಯಾಡಿಸಿದರೆ ಮಿಶ್ರಣ ಮುದ್ದೆಯಾಗಿಬಿಡುತ್ತದೆ. 

Tuesday, 27 March 2018

ಕಡ್ಲೇಬೀಜದ ಕಟ್ಲಿ । 10 ನಿಮಿಷದಲ್ಲಿ ಶೇಂಗಾ ಬರ್ಫಿ । ಪ್ರೆಷರ್ ಕುಕರ್ ನಲ್ಲಿ ತಯಾರಿಸಬಹುದಾದ ನೆಲಗಡಲೆ ಬರ್ಫಿ | ಒಪೋಸ್ ಕಡ್ಲೆಕಾಯಿ ಬರ್ಫಿ

ಕಾಜು ಕಟ್ಲಿ ಅಥವಾ ಕಾಜು ಬರ್ಫಿಯ ಹೆಸರನ್ನು ಸಾಮಾನ್ಯವಾಗಿ ಎಲ್ಲರೂ ಕೇಳಿಯೇ ಇರುತ್ತೀರಿ. ಅದರಂತೆಯೇ ಬಾದಾಮ್ ಕಟ್ಲಿಯೂ ಸಿಹಿ ಪ್ರಿಯರಿಗೆಲ್ಲ ಚಿರಪರಿಚಿತ. ಮೊದಲೆಲ್ಲ ಸ್ವೀಟ್ ಸ್ಟಾಲ್ ನಿಂದ ತಂದು ತಿನ್ನುತ್ತಿದ್ದ ಈ ಸಿಹಿತಿಂಡಿಗಳನ್ನು ಈಗ ತುಂಬಾ ಜನ ಮನೆಯಲ್ಲೇ ಬಹಳ ಚೆನ್ನಾಗಿ ತಯಾರಿಸುತ್ತಾರೆ. ಒಪೋಸ್ (One Pot One Shot) ಅಡುಗೆ ವಿಧಾನ ಬಂದಮೇಲಂತೂ ಅಡುಗೆ ಬರದಿದ್ದವರೂ ಥರಾವರಿ ಅಡುಗೆ, ಸ್ವೀಟ್ಸ್ ಮಾಡುವುದು ಸಾಧ್ಯವಾಗಿದೆ.
ಈಗ ಕೆಲವು ತಿಂಗಳುಗಳ ಹಿಂದೆ ನನ್ನ ಫ್ರೆಂಡ್ ಒಬ್ಬರು ಒಪೋಸ್ ಅಡುಗೆ ಪದ್ಧತಿಯನ್ನು ನನಗೆ ಪರಿಚಯಿಸಿದರು. ಒಪೋಸ್ ರೂವಾರಿಯಾದ ರಾಮಕೃಷ್ಣನ್ ರವರು ಯೂಟ್ಯೂಬ್ ನಲ್ಲಿ ಒಪೋಸ್ ವಿಧಾನದಲ್ಲಿ ಅಡುಗೆ ಮಾಡುವುದರ ಬಗ್ಗೆ ಅನೇಕ ವಿಡಿಯೋ ಗಳನ್ನು ಹಾಕಿದ್ದಾರೆ. ಕಷ್ಟದ ಅಡುಗೆಗಳನ್ನೂ ಈ ವಿಧಾನದಲ್ಲಿ ಎಷ್ಟು ಸುಲಭದಲ್ಲಿ ತಯಾರಿಸಬಹುದೆಂದು ನೋಡಿದರೆ ಆಶ್ಚರ್ಯವಾಗುತ್ತದೆ!
ಒಪೋಸ್ ವಿಧಾನ ಕಲಿತಮೇಲೆ ನನಗೆ ಬೇಗ ಅಡುಗೆ ಕೆಲಸ ಮುಗಿಸಲು ಸಾಧ್ಯವಾಗುತ್ತಿದೆ. ದಿನನಿತ್ಯ ತಯಾರಿಸುವ ಸೈಡ್ ಡಿಶ್ ಗಳಿಗೆ ಹೆಚ್ಚಾಗಿ ಒಪೋಸ್ ವಿಧಾನವನ್ನೇ ಅನುಸರಿಸುತ್ತೇನೆ. ಒಪೋಸ್ ಅಡುಗೆಗೆ ಎರಡು ಲೀಟರ್ ನ ಪ್ರೆಷರ್ ಕುಕರ್ ನನ್ನ ಬಳಿ ಇಲ್ಲ. ಭಯಪಡುತ್ತಲೇ ನನ್ನಲ್ಲಿರುವ 3 ಲೀಟರ್ ಕುಕರ್ ನಲ್ಲಿ ಶುರುವಾದವು ನನ್ನ ಪ್ರಯೋಗಗಳು. ಮೊದಲ ಪ್ರಯೋಗ ಸಕ್ಸೆಸ್ ಆದದ್ದರಿಂದ ಹಾಗೇ ಮುಂದುವರಿಯತೊಡಗಿದೆ ಈ ಅಡುಗೆ ವಿಧಾನ! ಇತ್ತೀಚೆಗೆ ಒಪೋಸ್ ಕಾಜು ಕಟ್ಲಿಯ ರೆಸಿಪಿ ನೋಡಿದಾಗ ಯೋಚನೆ ಬಂತು ಇದೇ ವಿಧದಲ್ಲಿ ಶೇಂಗಾ ಕಟ್ಲಿ ತಯಾರಿಸಿದರೆ ಚೆನ್ನಾಗಿ ಬರಬಹುದೆಂದು. ನನ್ನ ಅಮ್ಮ ಶೇಂಗಾ ಬರ್ಫಿಯನ್ನು ಬಹಳ ಚೆನ್ನಾಗಿ ತಯಾರಿಸುತ್ತಾರೆ. ಆದರೆ ಬರ್ಫಿ ಎಂದರೆ ಕೇಳಬೇಕೆ? ಮಿಶ್ರಣವನ್ನು ತಾಸುಗಟ್ಟಲೆ ಒಲೆಯಮೇಲೆ ಕೈಯಾಡಿಸುತ್ತ ಕಷ್ಟಪಡಬೇಕು. ನಾನು ಅಮ್ಮನ ರೆಸಿಪಿಯ ಅಳತೆಗಳನ್ನು ಒಪೋಸ್ ವಿಧಾನಕ್ಕೆ ಅನುಕೂಲವಾಗುವಂತೆ ಮಾರ್ಪಾಡು ಮಾಡಿಕೊಂಡು ಶೇಂಗಾ ಕಟ್ಲಿ ತಯಾರಿಸಿದ್ದಾಯಿತು. ಈ ಸ್ವೀಟ್ ಇಷ್ಟು ಚೆನ್ನಾಗಿ ಬರಬಹುದೆಂದು ನಾನೂ ನಿರೀಕ್ಷಿಸಿರಲಿಲ್ಲ! ನನ್ನ ಮಗಳಂತೂ ಈಗ ಶೇಂಗಾ ಕಟ್ಲಿಯ ದೊಡ್ಡ ಫ್ಯಾನ್ ಆಗಿಬಿಟ್ಟಿದ್ದಾಳೆ.
ಶೇಂಗಾ ಕಟ್ಲಿಯ ರೆಸಿಪಿ ಈ ಕೆಳಗಿನಂತಿದೆ:


ತಯಾರಿಸಲು ಬೇಕಾಗುವ ಸಮಯ: 7 - 8 ನಿಮಿಷಗಳು
ಸೆಟ್ ಆಗಲು ಬೇಕಾಗುವ ಸಮಯ: 20 ನಿಮಿಷಗಳು
ಡಿಫಿಕಲ್ಟಿ ಲೆವೆಲ್: ಸುಲಭ
ಈ ಅಳತೆಯಿಂದ 35 ಕಟ್ಲಿ / ಬರ್ಫಿ ಗಳನ್ನು ತಯಾರಿಸಬಹುದು

ಬೇಕಾಗುವ ಸಾಮಗ್ರಿಗಳು:

  • ಸಕ್ಕರೆ - 1 ಕಪ್ ಗಿಂತ 1 ಟೇಬಲ್ ಸ್ಪೂನ್ ಕಡಿಮೆ (1 ಕಪ್ = 200 ಗ್ರಾಂ)
  • ಹಾಲು - 1/2 ಕಪ್ 
  • ಶೇಂಗಾ ಪುಡಿ (ಹುರಿದು ಸಿಪ್ಪೆ ತೆಗೆದು ಪುಡಿಮಾಡಿದ್ದು) - 1 ಕಪ್ 
  • ತುಪ್ಪ - 1 ಟೀ ಚಮಚ 
  • ಪ್ರೆಶರ್ ಕುಕ್ಕರ್ 2 ಅಥವಾ 3 ಲೀಟರ್ ನದು (ನಾನು 3 ಲೀಟರ್ ನ ಕುಕ್ಕರ್ ಬಳಸಿದ್ದೇನೆ)

ತಯಾರಿಸುವ ವಿಧಾನ:
  • ಪ್ರೆಷರ್ ಕುಕ್ಕರ್ ನಲ್ಲಿ ಸಕ್ಕರೆ, ಹಾಲು ಸೇರಿಸಿ ಒಮ್ಮೆ ಮಿಕ್ಸ್ ಮಾಡಿ. ಸಕ್ಕರೆ ಹರಳುಗಳು ದೊಡ್ಡದಾಗಿದ್ದರೆ ಕರಗುವತನಕ ಕದಡಿ. 
  • ಕುಕ್ಕರ್ ನ ಮುಚ್ಚಳ ಮುಚ್ಚಿ ಸ್ವಲ್ಪ ದೊಡ್ಡ ಉರಿಯಲ್ಲಿ 6 ವಿಸಿಲ್ ಕೂಗಿಸಿ. ಪ್ರತಿ ವಿಸಿಲ್ ಆದಾಗಲೂ ಹೊರಚಿಮ್ಮುವ ನೀರನ್ನು ಸ್ವಚ್ಛಮಾಡಲು ಮರೆಯದಿರಿ. ಇಲ್ಲದಿದ್ದರೆ ವಿಸಿಲ್ ಸರಿಯಾಗಿ ಆಗುವುದಿಲ್ಲ. 
  • ಉರಿ ಆಫ್ ಮಾಡಿದ ತಕ್ಷಣ ಕುಕರ್ ನ ವೇಯ್ಟ್ ನ್ನು ಸ್ಪೂನ್ ನಿಂದ ಸ್ವಲ್ಪವೇ ಎತ್ತಿ ಪ್ರೆಷರ್ ಎಲ್ಲ ಹೋಗುವಂತೆ ಮಾಡಿ. 
  • ಪ್ರೆಷರ್ ಇಳಿದನಂತರ ಕುಕರ್ ಮುಚ್ಚಳ ತೆಗೆದು ಇದಕ್ಕೆ ಶೇಂಗಾಪುಡಿ ಸೇರಿಸಿ ಗಂಟಿಲ್ಲದಂತೆ ಬೇಗ ಮಿಕ್ಸ್ ಮಾಡಿ, ಮತ್ತೆ ಮುಚ್ಚಳ ಮುಚ್ಚಿ 20 ನಿಮಿಷ ಸೆಟ್ ಆಗಲು ಬಿಡಿ. 
  • 20 ನಿಮಿಷದ ನಂತರ ಕುಕ್ಕರ್ ಮುಚ್ಚಳ ತೆಗೆದು, ಕೈಗೆ ತುಪ್ಪ ಸವರಿಕೊಂಡು ಮಿಶ್ರಣವನ್ನು ಒಮ್ಮೆ ಮಿಕ್ಸ್ ಮಾಡಿಕೊಳ್ಳಿ. 
  • ತಯಾರಾದ ಮಿಶ್ರಣವನ್ನು ಜಿಡ್ಡು ಸವರಿದ ಪ್ಲೇಟ್ ನ ಮೇಲೆ ತೆಳ್ಳಗೆ ಹರಡಿ. ಬೇಕಾದ ಆಕಾರಕ್ಕೆ ಕತ್ತರಿಸಿ ಸವಿಯಿರಿ. 


ಟಿಪ್ಸ್:
  • ಈ ವಿಧಾನ ಅನುಸರಿಸಲು ಗ್ಯಾಸ್ ಸ್ಟವ್ ಅಥವಾ ಇಂಡಕ್ಷನ್ ಸ್ಟವ್ ಅಗತ್ಯ.    
  • ಶೇಂಗಾ ಪುಡಿ ಮಾಡುವಾಗ ಒಂದೇ ಸಮನೆ ತಿರುವಿಬಿಟ್ಟರೆ ಎಣ್ಣೆ ಬಿಟ್ಟುಕೊಳ್ಳುತ್ತದೆ. ಅದರ ಬದಲು ವಿಪ್ ಮಾಡುತ್ತ ಪೌಡರ್ ಮಾಡಿದರೆ ಚೆನ್ನಾಗಿ ಬರುತ್ತದೆ. 

Tuesday, 6 March 2018

ಅಕ್ಕಿಹಿಟ್ಟಿನ ಚಕ್ಲಿ

ಎಲ್ಲರಿಗೂ ನಮಸ್ಕಾರ!
ಇಷ್ಟು ದಿನವಾದರೂ ರೆಸಿಪಿ ಹಾಕದ ಕಾರಣ ನನ್ನ ಬರವಣಿಗೆ ನಿಂತುಹೋಯಿತೇನೋ ಎಂದು ಪರಿಚಯದವರೆಲ್ಲ ಕೇಳತೊಡಗಿದ್ದರು. ನಿಜ ಹೇಳಬೇಕೆಂದರೆ ನನಗೂ ಹಾಗೇ ಅನ್ನಿಸಿಬಿಟ್ಟಿತ್ತು! ಅಂತೂ ಇಂತೂ ತುಂಬಾ ದಿನಗಳ ನಂತರ ಬ್ಲಾಗ್ ಕಡೆಗೆ ನೋಡಲು ಸಮಯ ಸಿಕ್ಕಿದೆ. ನಮ್ಮ ಎರಡನೇ ಮಗುವಿನ ಆಗಮನ, ಊರು ಪ್ರಯಾಣ, ಮಕ್ಕಳ ಆರೈಕೆ ಇವುಗಳ ನಡುವೆ ಬರವಣಿಗೆಗೆ ಸಮಯವೇ ಸಿಗದಂತಾಗಿಬಿಟ್ಟಿದೆ. ಇನ್ನಾದರೂ ನಿಯಮಿತವಾಗಿ ಬ್ಲಾಗ್ ಕಡೆ ಸ್ವಲ್ಪ ಸಮಯ ಹೊಂದಿಸಿಕೊಳ್ಳೋಣವೆಂದುಕೊಂಡಿದ್ದೇನೆ, ಏನಾಗುವುದೋ ನೋಡೋಣ!
ಈಗ ನಾನು ಬರೆಯ ಹೊರಟಿರುವ ಚಕ್ಲಿ ರೆಸಿಪಿ ನನ್ನ ಅಮ್ಮನಿಂದ ಕಲಿತದ್ದು. ನನ್ನ ಬಾಳಂತನಕ್ಕೆ ಅಮ್ಮ ನಮ್ಮಲ್ಲಿಗೆ ಬಂದಾಗ ಮೊಮ್ಮಗಳಿಗೆ ಇಷ್ಟವೆಂದು ಚಕ್ಲಿ ಮಾಡಿದ್ದರು. ಗರಿಯಾಗಿ, ಬಾಯಲ್ಲಿಟ್ಟರೆ ಕರಗುವಂತಿದ್ದ ಚಕ್ಲಿ ಮಾಡಿದಷ್ಟೇ ಬೇಗ ಖಾಲಿಯೂ ಆಯಿತು. ರುಚಿಕರವಾದ ಈ ಚಕ್ಲಿಯನ್ನು ನೀವೂ ತಯಾರಿಸಿ ನೋಡಿ!


ತಯಾರಿಸಲು ಬೇಕಾಗುವ ಸಮಯ: 2 ಘಂಟೆ
ಅಕ್ಕಿ ನೆನೆಸುವ ಸಮಯ: 2 - 3 ಘಂಟೆ 
ಡಿಫಿಕಲ್ಟಿ ಲೆವೆಲ್: ಕಷ್ಟಕರ 
ಈ ಅಳತೆಯಿಂದ ಸುಮಾರು 60 ಚಕ್ಲಿಗಳನ್ನು ತಯಾರಿಸಬಹುದು 

ಬೇಕಾಗುವ ಸಾಮಗ್ರಿಗಳು:

  • ಅಕ್ಕಿ - 1 ದೊಡ್ಡ ಕಪ್ ನಷ್ಟು (1 ಕಪ್ = 175ಗ್ರಾಂ)
  • ಹುರಿದ ಅಕ್ಕಿಹಿಟ್ಟು - 3 1/2 ಕಪ್ (ಅಂದಾಜು)
  • ಎಳ್ಳು - 4 ಟೀ ಸ್ಪೂನ್ 
  • ಜೀರಿಗೆ - 2 ಟೀ ಸ್ಪೂನ್ 
  • ಓಮ - 2 ಟೇಬಲ್ ಸ್ಪೂನ್ 
  • ಬೆಣ್ಣೆ - ನಿಂಬೆಗಾತ್ರ 
  • ಉಪ್ಪು - ರುಚಿಗೆ ತಕ್ಕಷ್ಟು 
  • ನೀರು - ಹಿಟ್ಟು ರುಬ್ಬಲು 
  • ಕರಿಯಲು ಎಣ್ಣೆ 


ತಯಾರಿಸುವ ವಿಧಾನ:

  • ಅಕ್ಕಿಯನ್ನು ಎರಡುಸಲ ತೊಳೆದು, 2 - 3 ಘಂಟೆಕಾಲ ನೀರಿನಲ್ಲಿ ನೆನೆಸಿಡಿ. 
  • ನೆನೆಸಿದ ಅಕ್ಕಿಯ ನೀರನ್ನು ಬಸಿದುಕೊಳ್ಳಿ. ಅಕ್ಕಿ, ಎಳ್ಳು, ಜೀರಿಗೆ, ಓಮ ಇಷ್ಟನ್ನೂ ಸೇರಿಸಿ ದೋಸೆ ಹಿಟ್ಟಿನ ಹದಕ್ಕೆ ನುಣ್ಣಗೆ ರುಬ್ಬಿ. ರುಬ್ಬಲು ಬೇಕಾಗುವಷ್ಟು ನೀರು ಸೇರಿಸಿಕೊಳ್ಳಿ. 
  • ರುಬ್ಬಿಕೊಂಡ ಹಿಟ್ಟಿಗೆ 2 1/2 ಟೀ ಸ್ಪೂನ್ ನಷ್ಟು ಉಪ್ಪು, ಎರಡು ಕಪ್ ನಷ್ಟು ನೀರು ಸೇರಿಸಿ ಮಿಕ್ಸ್ ಮಾಡಿ. 
  • ರುಬ್ಬಿಕೊಂಡ ಹಿಟ್ಟನ್ನು ಒಂದು ದಪ್ಪ ತಳದ ಪಾತ್ರೆಯಲ್ಲಿ ಹಾಕಿ ಕಾಯಲಿಡಿ. 
  • ಇದಕ್ಕೆ ನಿಂಬೆಗಾತ್ರದಷ್ಟು ಬೆಣ್ಣೆಯನ್ನು ಸೇರಿಸಿ ಹಿಟ್ಟು ದಪ್ಪಗಾಗುವವರೆಗೆ ಬಿಡದೇ ಕೈಯಾಡಿಸುತ್ತಿರಿ. 
  • ಹಿಟ್ಟು ದಪ್ಪಗಾದಾಗ ಇದಕ್ಕೆ 3 1/2 ಕಪ್ ನಷ್ಟು ಹುರಿದ ಅಕ್ಕಿಹಿಟ್ಟನ್ನು ಸೇರಿಸಿ ಬಿಸಿ ಇರುವಾಗಲೇ ಚೆನ್ನಾಗಿ ಮಿಕ್ಸ್ ಮಾಡಿ. 
  • ಮಿಶ್ರಣವನ್ನು ಚೆನ್ನಾಗಿ ನಾದಿ ಮೆತ್ತಗಿನ ಆದರೆ ಕೈಗೆ ಅಂಟದ ಹದಕ್ಕೆ ಹಿಟ್ಟನ್ನು ರೆಡಿಮಾಡಿಕೊಳ್ಳಿ. 
  • ಚಕ್ಲಿ ಹಿಟ್ಟನ್ನು ಒದ್ದೆ ಬಟ್ಟೆ ಮುಚ್ಚಿ ಇಟ್ಟು, ಬೇಕಾದಷ್ಟೇ ಹಿಟ್ಟನ್ನು ತೆಗೆದುಕೊಂಡು ಚಕ್ಲಿ ಒರಳಿನಲ್ಲಿ ಹಾಕಿ ಒತ್ತಿ ಚಕ್ಲಿ ಆಕಾರಕ್ಕೆ ಸುತ್ತಿಕೊಂಡು ಕಾದ ಎಣ್ಣೆಯಲ್ಲಿ ಗರಿಯಾಗುವಂತೆ ಕರಿಯಿರಿ.   

Thursday, 16 March 2017

ಎಗ್ ಲೆಸ್ ಸ್ಟ್ರಾಬೆರಿ ಐಸ್ ಕ್ರೀಮ್

ಮಕ್ಕಳಿಗೆ ಸಾಮಾನ್ಯವಾಗಿ ಇಷ್ಟವಾಗುವ ಹಣ್ಣುಗಳಲ್ಲಿ ಸ್ಟ್ರಾಬೆರಿಯೂ ಒಂದು. ನನ್ನ ಮಗಳಿಗೂ ಸ್ಟ್ರಾಬೆರಿ ಹಣ್ಣೆಂದರೆ ತುಂಬ ಇಷ್ಟ. ಆದರೆ ಈ ಹಣ್ಣು ಫ್ರಿಜ್ ನಲ್ಲಿಟ್ಟರೂ ಬೇಗ ಕೆಟ್ಟುಹೋಗುತ್ತದೆ. ಹಣ್ಣು ತಿಂದು ಖಾಲಿಯಾಗುವುದಿಲ್ಲವೆಂದಾದರೆ ನಮ್ಮ ಮನೆಯಲ್ಲಿ ಜ್ಯಾಮ್, ಮಿಲ್ಕ್ ಶೇಕ್, ಐಸ್ ಕ್ರೀಮ್ ಹೀಗೆ ಏನಾದರೊಂದನ್ನು ತಯಾರಿಸಿ ಸವಿಯುತ್ತೇವೆ. ಯಾವುದೇ ಕೃತಕ ಬಣ್ಣ, ಫ್ಲೇವರ್, ಪ್ರಿಸರ್ವೇಟಿವ್ ಗಳನ್ನು ಬಳಸದೆ ಮನೆಯಲ್ಲೇ ಸುಲಭದಲ್ಲಿ ತಯಾರಿಸಬಹುದಾದ ಈ ತಿನಿಸುಗಳು ಆರೋಗ್ಯಕ್ಕೂ ಒಳ್ಳೆಯದು.
ಸ್ಟ್ರಾಬೆರಿ ಐಸ್ ಕ್ರೀಮ್ ತಯಾರಿಸುವ ವಿಧಾನ ಈ ಕೆಳಗಿನಂತಿದೆ:  


ತಯಾರಿಸಲು ಬೇಕಾಗುವ ಸಮಯ: 25 ನಿಮಿಷಗಳು
ಕೂಲಿಂಗ್ ಟೈಮ್: 5 - 6 ಘಂಟೆ
ಸರ್ವಿಂಗ್ಸ್ - 7 ರಿಂದ 8 ಜನರಿಗೆ ಆಗುತ್ತದೆ

ಬೇಕಾಗುವ ಸಾಮಗ್ರಿಗಳು:

  • ಸ್ಟ್ರಾಬೆರಿ ಹಣ್ಣು - 250 ಗ್ರಾಂ 
  • ಥಿಕ್ ಕ್ರೀಮ್ - 250 ಗ್ರಾಂ
  • ಸಕ್ಕರೆ - 2 ಟೇಬಲ್ ಸ್ಪೂನ್ ಅಥವಾ ರುಚಿಗೆ ತಕ್ಕಷ್ಟು 


ತಯಾರಿಸುವ ವಿಧಾನ:

  • ಸ್ಟ್ರಾಬೆರಿ ಹಣ್ಣುಗಳನ್ನು ನೀರಿನಲ್ಲಿ ಚೆನ್ನಾಗಿ ತೊಳೆದು ತೊಟ್ಟು ತೆಗೆದು, ಸಣ್ಣ / ಮೀಡಿಯಂ ಸೈಜಿನ ಚೂರುಗಳಾಗಿ ಹೆಚ್ಚಿಕೊಳ್ಳಿ. 
  • ಥಿಕ್ ಕ್ರೀಮ್, ಹೆಚ್ಚಿದ ಸ್ಟ್ರಾಬೆರಿ ಮತ್ತು ಸಕ್ಕರೆಯನ್ನು ಒಟ್ಟಿಗೆ ಮಿಕ್ಸಿ / ಬ್ಲೆಂಡರ್ ನಲ್ಲಿ ಹಾಕಿ ನುಣ್ಣಗಾಗುವವರೆಗೆ ತಿರುವಿ. 
  • ತಯಾರಾದ ಮಿಶ್ರಣವನ್ನು ಗಾಳಿಯಾಡದ ಬಾಕ್ಸ್ ನಲ್ಲಿ ಹಾಕಿ 2 - 3 ಘಂಟೆಕಾಲ ಫ್ರೀಜರ್ ನಲ್ಲಿಡಿ. 
  • ಐಸ್ ಕ್ರೀಮ್ ಮಿಶ್ರಣ ಗಟ್ಟಿಯಾದ ನಂತರ ಇದನ್ನು ಫ್ರೀಜರ್ ನಿಂದ ತೆಗೆದು ಮಿಕ್ಸಿ / ಬ್ಲೆಂಡರ್ ನಲ್ಲಿ 4 - 5 ನಿಮಿಷ ತಿರುವಿ ಪುನಃ ಫ್ರೀಜರ್ ನಲ್ಲಿಡಿ. ಇದೇ ರೀತಿ 2 - 3 ಬಾರಿ ಮಾಡಿದರೆ ಐಸ್ ಕ್ರೀಮ್ ತೀರಾ ಗಟ್ಟಿಯಾಗದೆ, ಮೆತ್ತಗೆ ಚೆನ್ನಾಗಿ ಆಗುತ್ತದೆ. 
  • ಐಸ್ ಕ್ರೀಮ್ ಗಟ್ಟಿಯಾದ ನಂತರ ಫ್ರೀಜರ್ ನಿಂದ ತೆಗೆದು ಸವಿಯಿರಿ!



ಟಿಪ್ಸ್:




  • ಐಸ್ ಕ್ರೀಮ್ ನಲ್ಲಿ ಸ್ಟ್ರಾಬೆರಿ ಚೂರುಗಳು ಸಿಗಬೇಕೆಂದರೆ 3 - 4 ಸ್ಟ್ರಾಬೆರಿ ಹಣ್ಣುಗಳನ್ನು ಸಣ್ಣಗೆ ಹೆಚ್ಚಿ, ಮಿಶ್ರಣವನ್ನು ಕೊನೆಯಬಾರಿ ಮಿಕ್ಸಿಗೆ ಹಾಕಿದ ನಂತರ ಅದರೊಡನೆ ಮಿಕ್ಸ್ ಮಾಡಿ.  

Tuesday, 31 January 2017

ಹಾಲುಗುಂಬಳಕಾಯಿ ಪಾಯಸ । ಸೋರೆಕಾಯಿ ಪಾಯಸ

ಹಾಲುಗುಂಬಳ ಅಥವಾ ಸೋರೆಕಾಯಿ ನಮಗೆ ಇಲ್ಲಿ ವರ್ಷದ ಎಲ್ಲ ಕಾಲದಲ್ಲೂ ಸಾಮಾನ್ಯವಾಗಿ ಸಿಗುವ ತರಕಾರಿಗಳಲ್ಲಿ ಒಂದು.  ಚೀನಾ ದೇಶದವರೂ ಈ ತರಕಾರಿಯನ್ನು ಬಳಸುವುದರಿಂದ ಕೇವಲ ಭಾರತೀಯ ಅಂಗಡಿಗಳಲ್ಲಷ್ಟೇ ಅಲ್ಲದೆ ಏಶಿಯನ್ ಗ್ರಾಸರಿ ಅಂಗಡಿಗಳಲ್ಲೂ ಸೋರೆಕಾಯಿ ಸಿಗುತ್ತದೆ. ನಮ್ಮ ಮನೆಯಲ್ಲಿ ಹೆಚ್ಚಿನ ದಿನಗಳಲ್ಲಿ ಅಪ್ಪಟ ಭಾರತೀಯ ಶೈಲಿಯ ಅಡುಗೆಯಾದ್ದರಿಂದ ಸೋರೆಕಾಯಿ ಆಗಾಗ ಅಡುಗೆಯಲ್ಲಿ ಬಳಕೆಯಾಗುತ್ತಿರುತ್ತದೆ. ಅನೇಕ ವಿಟಾಮಿನ್ ಹಾಗೂ ಮಿನರಲ್ ಗಳ ಆಗರವಾಗಿರುವ ಈ ತರಕಾರಿಯ ನಿಯಮಿತ ಸೇವನೆ ಆರೋಗ್ಯದ ದೃಷ್ಟಿಯಿಂದಲೂ ಒಳ್ಳೆಯದು. 
ಹಾಲುಗುಂಬಳಕಾಯಿ ಪಲ್ಯ ತಯಾರಿಸುವ ವಿಧಾನವನ್ನು ಈ ಮೊದಲೇ ಬರೆದಿದ್ದೆ. ಹಾಲುಗುಂಬಳಕಾಯಿ ಬಳಸಿ ಪಾಯಸ ತಯಾರಿಸುವ ವಿಧಾನವನ್ನು ಇಂದು ನಿಮ್ಮೊಂದಿಗೆ ಹಂಚಿಕೊಳ್ಳುತ್ತಿದ್ದೇನೆ. ರುಚಿಕರವಾದ ಈ ಪಾಯಸವನ್ನು ನೀವೂ ತಯಾರಿಸಿ ನೋಡಿ!


ತಯಾರಿಸಲು ಬೇಕಾಗುವ ಸಮಯ: 35 - 40 ನಿಮಿಷಗಳು 
ಸರ್ವಿಂಗ್ಸ್: 3 ಜನರಿಗೆ ಆಗುತ್ತದೆ 
ಡಿಫಿಕಲ್ಟಿ ಲೆವೆಲ್: ಮೀಡಿಯಮ್ 

ಬೇಕಾಗುವ ಸಾಮಗ್ರಿಗಳು:

  • ಸಕ್ಕರೆ - 3/4 ಕಪ್ (1 ಕಪ್ =
  • ಸಿಪ್ಪೆ, ಬೀಜ ತೆಗೆದು ಸಣ್ಣಗೆ / ಮೀಡಿಯಂ ಸೈಜಿಗೆ ಹೆಚ್ಚಿದ ಹಾಲುಗುಂಬಳ ಹೋಳುಗಳು - 2 ಕಪ್ 
  • ಮೀಡಿಯಮ್ ರವೆ - 1/3 ಕಪ್ 
  • ಬೆಲ್ಲ - 2 ಟೇಬಲ್ ಚಮಚ (ಟಿಪ್ಸ್ ನೋಡಿ)
  • ಉಪ್ಪು - ದೊಡ್ಡ ಚಿಟಿಕೆ 
  • ತುಪ್ಪ - 1 ಟೀ ಚಮಚ 
  • ಹಾಲು - 2 1/2 ಕಪ್ 
  • ನೀರು - 2 1/2 ಕಪ್ 
  • ಏಲಕ್ಕಿಪುಡಿ - 1 ಟೀ ಚಮಚ
  • ಕೇಸರಿ ದಳ - 8 ರಿಂದ 10 (ಬೇಕಿದ್ದರೆ)

ತಯಾರಿಸುವ ವಿಧಾನ:

  • ಒಂದು ಪಾತ್ರೆಯಲ್ಲಿ ನೀರು ಬಿಸಿಗಿಡಿ. ಬೆಚ್ಚಗಾದ ನಂತರ ಇದಕ್ಕೆ ತುಪ್ಪ, ಹೆಚ್ಚಿದ ಹಾಲುಗುಂಬಳ ಸೇರಿಸಿ ಹಾಲುಗುಂಬಳ ಹೋಳುಗಳು ಮೆತ್ತಗಾಗುವವರೆಗೆ ಬೇಯಿಸಿ. 
  • ರವೆಯನ್ನು ನೀರಿನಲ್ಲಿ ತೊಳೆದು, ನೀರು ಬಸಿದಿಡಿ. 
  • ಹೋಳು ಮೆತ್ತಗಾದ ನಂತರ ಅದಕ್ಕೆ ತೊಳೆದ ರವೆ ಸೇರಿಸಿ ಗಂಟಾಗದಂತೆ ಎರಡು ನಿಮಿಷ ಕೈಯಾಡಿಸಿ. 
  • ನಂತರ ಇದಕ್ಕೆ ಉಪ್ಪು, ಸಕ್ಕರೆ, ಬೆಲ್ಲ, ಹಾಲು, ಕೇಸರಿದಳ ಸೇರಿಸಿ 8 - 10 ನಿಮಿಷ ಕುದಿಸಿ. 
  • ಕೊನೆಯಲ್ಲಿ ಏಲಕ್ಕಿಪುಡಿ ಸೇರಿಸಿ ಉರಿ ಆಫ್ ಮಾಡಿ. 
  • ಈ ಪಾಯಸವನ್ನು ಬಿಸಿಯಾಗಿಯೂ ತಿನ್ನಬಹುದು ಅಥವಾ ಫ್ರಿಜ್ ನಲ್ಲಿಟ್ಟು ತಣ್ಣಗೆ ಮಾಡಿಕೊಂಡೂ ಸವಿಯಬಹುದು. 


ಟಿಪ್ಸ್:

  • ಬೆಲ್ಲ ಇಷ್ಟವಾದರೆ ಸಕ್ಕರೆಯ ಪ್ರಮಾಣ ಕಡಿಮೆ ಮಾಡಿ, ಜಾಸ್ತಿ ಬೆಲ್ಲ ಬಳಸಿ. ಬೆಲ್ಲ ಇಷ್ಟವಾಗದಿದ್ದರೆ ಸಕ್ಕರೆಯೊಂದನ್ನೇ ಬಳಸಿ. ಜಾಸ್ತಿ ಬೆಲ್ಲ ಬಳಸುವುದಾದರೆ ಕೇಸರಿ ದಳಗಳನ್ನು ಸೇರಿಸದಿದ್ದರೂ ಆಗುತ್ತದೆ. 
Related Posts Plugin for WordPress, Blogger...